ပိတ်ရက်တွေကို ချစ်ရတဲ့ အစားအသောက်တွေနဲ့ အတူတူ ကုန်ဆုံးကြမယ်လေ။ ဒီတစ်ပတ်မှာတော့ အစားအသောက်ချစ်သူတိုင်း အကြိုက်တွေ့စေမယ့် ရိုးရှင်းလွယ်ကူတဲ့ မြိတ်ကပ်ကြေးကိုက် ပြုလုပ်နည်းကို ပြောပြပေးချင်ပါတယ်။ 

ပါဝင်ပစ္စည်း​လေး​တွေက​တော့ ...

• ညှပ်ခေါက်ဆွဲ
• ပုဇွန် ၊ ပြည်ကြီးငါး
• ကြက်သား
• ပဲပြုတ်
• ပဲပင်ပေါက်
• ကန်စွန်းရွက်
• ​နေကြာဆီ
• ရှာလကာရည်
• ငံပြာရည်
• ပဲငံပြာရည်၊ ကြာညှို့
• သကြား၊ ကြက်သားမှုန့်
• ငရုတ်သီး​မှုန့် နှင့် အတောင့်
• ကြက်ဥ

ပါဝင်ပစ္စည်းတွေ စုထားပြီးပြီ ဆိုရင်တော့ ပြုလုပ်ပုံ ပြုလုပ်နည်း အဆင့်ဆင့်ကို ပြောပြပေးသွားချင်ပါတယ်။ 

• ပထမဆုံးအနေနဲ့ ညှပ်ခေါက်ဆွဲကို ဖွထားပြီး ငံပြာရည်၊ ပဲငံပြာရည်၊ ကြာညှို့၊ ကြက်သားမှုန့်၊ သကြား၊ ရှာလကာရည်တို့နဲ့ နယ်ထားပေးပါ။
• ပုဇွန်ကို အခွံချွတ်၊ ချေးချွတ်သန့်စင်ပါ။ ပြည်ကြီးငါး၊ ကြက်သား စတာတွေကို ခပ်သေးသေးအရွယ် အတုံးလေးတွေ တုံးပေးထားပါ။ 
• ကြက်ဥ ၂လုံးခန့်ကို မွှေထားပြီး ဒယ်အိုးထဲမှာ ဆီပူလာတာနဲ့ ခလောက်ထားတဲ့ ကြက်ဥကို မွှေပြီးကြော်ပေးပါ။ ပြီးရင်တော့ ဒယ်အိုးထဲကနေ ဆယ်ထားပါ။ 
• ဒယ်အိုးထဲမှာ ကျန်နေတဲ့ဆီကို ငရုတ်သီးမှုန့်နဲ့ ငရုတ်သီး​တောင့် ရောပြီး ဆီသပ်ပေးပါ။ ဆီသပ်ပြီး မွှေးလာရင် ကြက်သားကို ထည့်ကြော်ပြီး အနည်းငယ် ခြောက်သွားတဲ့အခါ ပင်လယ်စာတွေကို ထည့်ကြော်လိုက်ပါ။ 
• ကြော်နေတုန်းမှာ ပဲငံပြာရည် ထမင်းစားဇွန်းနဲ့ (၁) ဇွန်းထည့်ပြီး မွှေပေးပါ။ 
• အသားတွေ ကျက်လာပြီဆိုရင် ညှပ်ခေါက်ဆွဲဖတ်တွေကို ထည့်ပြီး ကြော်ပါ။  
• ခေါက်ဆွဲဖတ်တွေ နှံ့အောင်ကြော်ပြီးရင်တော့ ပဲပြုတ်၊ ကန်စွန်းရွက်၊ ပဲပင်ပေါက်နဲ့ မွှေကြော်ထားတဲ့ ကြက်ဥကြော်တို့ကို ထည့်ပြီး (၂) မိနစ်လောက် ထပ်မွှေပေးလိုက်ပါ။
• ဒါပြီးရင်တော့ ပန်းကန်လှလှလေးထဲ ထည့်ပြီး အနံ့မွှေးမွှေး အရသာရှိတဲ့ မြိတ်ကပ်ကြေးကိုက်ကို စတင် သုံးဆောင်နိုင်ပါပြီ။ 

ရန်ကုန်မြို့မှာရှိတဲ့ မြိတ်ကပ်ကြေးကိုက်နဲ့ တစ်ခြားသော စားသောက်ဆိုင်တွေကို ရှာဖွေချင်တယ်ဆိုရင်တော့ အောက်ပါလင့်ခ်မှာ ဝင်ရောက်ရှာဖွေလို့ ရပါတယ်နော်။ 

>> https://bit.ly/342ftIz