မြန်မာ့အစားစာအချိုပွဲတွေထဲက တခုဖြစ်တဲ့ ငှက်ပျောသီးဆနွင်းကင်းကို မွေးနေ့ပွဲအလှူပွဲတွေမှာ တည်ခင်းလေ့ရှိတာမို့ အတော်များများနှစ်သက်ကြမယ်ထင်ပါတယ်။ ဒါကြောင့်မို့ အိမ်မှာ လွယ်လွယ်ကူကူလုပ်လို့ ရမယ့်နည်းလေးကို ပြောပြချင်ပါတယ်။ 

ပါဝင်ပစ္စည်း

ရခိုင်ငှက်ပျောသီး - အလုံး၂၀

ဂျုံမှုန့် - ၁၀၀ဂရမ်

ရွှေကြည်မှုန့် အနု - ၁၀၀ဂရမ်

ကြက်ဥ - ၃လုံး

သကြား - ၁၂၀ဂရမ်

ထောပတ်/ဆီ -၁၀၀ဂရမ်

သစ်သီးခြောက်အရော - ၁၀၀ ဂရမ်

အုန်းနို့ခရင်မ် - ၃၀၀ ml

အုန်းသီးမှုန့် - တစ်ပန်းကန် ၃၀ ဂရမ်

ဆား - လ္ဘက်ဇွန်း တဝက်

အရောင်အနီ - ၃စက်

ဘိန်းစေ့ - တစ်ဇွန်း Tbsp

ပြင်ဆင်ပြုလုပ်နည်း

(၁)ဦးစွာ ပထမဇလုံတခုတွင် ငှက်ပျောသီးမှည့်ကိုအာလူးချေတံဖြင့်ချေပေးပါ။

(၂)အားလုံးကြေပါက ကျန်ပါဝင်ပစ္စည်းများအားလုံးကို (ဘိန်းစေ့မှအပ)တစ်ခုစီ ထည့်ပြီးမွေပေးပါ။ဂျုံလုံးများမဖြစ်စေရန်သေချာမွေပေးပါ။

(၃)ပြီးလျှင် အိုးတခုတွင်ထည့်ပြီး မီးပေါ်တင်ကာ ဆီပြန်လုံးလာသည်ထိမွေပေးပြီး ဆီလူးထားသောမုန့်ဖုတ်ဘန်းတွင် မုန့်နှစ်ကိုလောင်းထည့်ပါ။

(၄)မျက်နှာပြင်ညီအောင်လုပ်ပြီး အပေါ်မှဘိန်းစေ့ဖြူးကာ အပေါ်မီးများများ အောက်မီးနည်းနည်းဖြင့်ဖုတ်ပါ။Ovenအပူချိန် အပေါ် (၂၂၀) ဒီဂရီ အောက်(၁၂၀)ဒီကရီဖြင့် ၃၀မိနစ်ခန့်ဖုတ်ပါမယ်။ (၁၅) မိနစ်ကို တစ်ခါလောက် လှည့်ပေးဖို့မမေ့ပါနဲ့။ 

(၅)မုန့်မျက်နှာပြင် အရောင်ပြောင်းပြီဆိုတာနဲ့ မုန့်ဘန်းအလယ်ကို တုတ်သေးသေးနဲ့ထိုးကြည့်ပြီး မုန့်သားကျက်မကျက်စစ်ကြည့်ပါ။မုန့်သားကျက်ပြီဆိုရင်ထုတ်ယူအအေးခံ၍ လိုသလိုလှီးဖြတ်ပြီးသုံးဆောင်နိုင်ပါပြီ ။