အခုနောက်ပိုင်း ဘေထုပ်ထည်လေးတွေကို Online ကနေတစ်ဆင့် ရောင်းနေကြပြီး ဝယ်သူတွေကလည်း သဘောကျနှစ်သက်နေတာကို တော်တော်လေးတွေ့လာရပါတယ်။

မြန်မာပြည်မှာ ဘေထုပ်အထည် တည်ရှိလာတာ ရာစုနှစ်တစ်စုကျော်ခဲ့ပါပြီ။ ဘေထုပ်ဆိုင်တွေက ကိုလိုနီခေတ်နှောင်းပိုင်းကတည်းက တည်ရှိခဲ့တာဖြစ်ပြီး အားလုံးနီးပါးလက်ခံလာတာကတော့ သုံးနှစ်၊ လေးနှစ်ဝန်းကျင်လောက်ပဲ ရှိပါသေးတယ်။ 

ဘေထုပ်ဝတ်တာ/ဝယ်တာက လုံး၀ ရှက်စရာမဟုတ်ပါဘူး။ တကယ်က နိုင်ငံတကာမှာ ဘေထုပ်အထည်တွေကို သာမန်အထည်တွေထက် လူပိုစိတ်ဝင်စားကြပါတယ်။ ဘာကြောင့်လဲဆိုရင် နာမည်ကြီး Brand အထည်တွေကို စျေးနှုန်းသက်သာစွာနဲ့ ရရှိနိုင်တဲ့ တစ်ခုတည်းသောနေရာက Thrift Stores တွေ ဖြစ်ပါတယ်။

ကြည့်မြင်တိုင် ညစျေး ဘေထုပ်တန်းကတော့ ရန်ကုန်မြို့မှာရော မြန်မာနိုင်ငံမှာပါ နာမည်ကျော်ကြားတဲ့ နေရာတစ်ခုလို့ ပြောလို့ရပါတယ်။

ဘေထုပ်အမျိုးအစားများစွာကို ဝင်လာတဲ့ နိုင်ငံပေါ် မူတည်ပြီး ခွဲခြားနိုင်ပါတယ်။ မြန်မာပြည်မှာတော့ ဂျပန်၊ ကိုရီးယား၊ ထိုင်း ဘေထုပ်တွေ ပိုများပါတယ်။ အထည် Quality ပေါ်မူတည်ပြီး စျေးနှုန်းအနည်းအများ ကွာခြားပါတယ်။ 

အခုလိုကြပ်တည်းနေတဲ့ကာလမှာ ဘေထုပ်ထည်ဝယ်ဝတ်တာက သင့်ဘတ်ဂျက်ကို ချွေတာရာရောက်တဲ့အပြင် ဘယ်လိုအကျိုးကျေးဇူးတွေ ထပ်ရှိသေးလဲဆိုတာ ပြောပြေပေးသွားပါမယ်။

(၁) ဆန်းသစ်တဲ့ ဖက်ရှင်အမြင် ရရှိခြင်း

ဘေထုပ်တိုင်းကတော့ ခေတ်ဟောင်းအထည်တွေ မဟုတ်ကြပါဘူး။ ခေတ်ဟောင်းစတိုင် အဝတ်အထည်တွေလည်းရှိသလို လွန်ခဲ့တဲ့ နှစ်နှစ် သုံးနှစ်လောက်က ခေတ်စားခဲ့တဲ့ အနီးစပ်ဆုံးဖက်ရှင်တွေလည်း ရနိုင်ပါတယ်။ ဘေထုပ်အထည်ကို ဝယ်ယူဝတ်ဆင်သူတွေက မတူညီတဲ့ ဖက်ရှင်တွေကို အပေါ်အောက်တွဲစပ်ပြီး ခေတ်နဲ့အညီ တန်းဝင်အောင် ပြောင်းလဲဝတ်ဆင်ကြရတာမို့ သင့်ဖက်ရှင်အမြင်ကို ရင့်သန်စေပါတယ်။

(၂) ပတ်ဝန်းကျင် ထိခိုက်မှု လျှော့ချခြင်း

အဝတ်အစားအသစ်တွေ ဖန်တီးတဲ့အခါ အဝတ်အစားကြာရှည်ခံအောင်၊ အရောင်လှအောင် ဓါတုပစ္စည်းတွေ အသုံးပြုရပါတယ်။ ဒီဓါတုပစ္စည်းတွေက ပတ်ဝန်းကျင်ကို ထိခိုက်စေပါတယ်။ ဘေထုပ်က အထည်သစ်မဟုတ်ဘဲ Recycle သဘောမျိုးဖြစ်တဲ့အတွက် ဘေးပတ်ဝန်းကျင်ညစ်ညမ်းမှုကို အထိုက်အလျောက် လျှော့ချပေးပါတယ်။

(၃) ပိုက်ဆံကုန်ကျစရိတ် သက်သာခြင်း

ဘေထုပ်တွေထဲကနေ နာမည်ကျော် Brand တွေ ရတတ်ပါတယ်။ မြန်မာနိုင်ငံထုတ်မဟုတ်ဘဲ နိုင်ငံခြားထုတ် အထည်ကိုမှ စျေးနှုန်းသက်သာစွာနဲ့ ဝယ်ယူနိုင်တဲ့ အခွင့်အရေးကို ရရှိပါတယ်။ ဘေထုပ်ဝယ်တာက အင်္ကျီအသစ်ဝယ်တာထက် သုံးပုံ နှစ်ပုံလောက်ထိ စျေးသက်သာပါတယ်။ ဒါကြောင့်လည်း အခုနောက်ပိုင်း လူကြီး၊ လူငယ်မရွေး ဘေထုပ်အထည် သဘောကျလာခြင်း ဖြစ်ပါတယ်။

(၄) Quality ကောင်းတဲ့ အထည်တွေ ရရှိခြင်း

ဘေထုပ်ထည်တိုင်း အကောင်းတွေချည်းတော့ မဟုတ်ပါဘူး။ ကောင်းတာရော၊ မကောင်းတာပါ ရောထွေးနေပါတယ်။ သေသေချာချာ အချိန်ပေးပြီး ရွေးချယ်ခြင်းဖြင့် Quality ကောင်းတဲ့ အထည်တွေ ရရှိလာမှာပါ။

(၅) လုပ်အားချွေတာခြင်း

အထည်ချုပ်စက်ရုံတွေမှာ လုပ်သားတွေဟာ လုပ်ခလစာနည်းနည်းနဲ့ သတ်မှတ်ထားတဲ့ နာရီတွေထက်ပိုပြီး အချိန်ပေါင်းများစွာ နေ့စဥ်အလုပ်လုပ်ရပါတယ်။ အထည်အသစ်တွေ ဝယ်ယူတာ လျှော့ချခြင်းဖြင့် ဒီပြဿနာကို တစ်ဖက်တစ်လမ်းကနေ ကူညီဖြေရှင်းရာ ရောက်ပါတယ်။